Боздошти қочоқчӣ дар ноҳияи Ҳамадонӣ

Душанбе, 05.01.2015 (АМИТ «Ховар», Лайло Тоирӣ).- Рӯзи якуми январи соли 2015 дар асоси хабари фаврӣ кормандони Агентии назорати маводи нашъаовари назди Президенти Ҷумҳурии Тоҷикистон дар якҷоягӣ бо хизматчиёни ҳарбии Сарраёсати Қӯшунҳои сарҳадии КДАМ ҶТ дар қитъаи отряди сарҳадии “Ҳамадонӣ” кӯшиши қочоқи маводи нашъаоварро дар ҳаҷми махсусан калон пешгирӣ намуданд.
Тавре ки аз хадамоти матбуоти агентӣ иттилоъ доданд, як гурӯҳи мусаллаҳи қочоқчиёни афғон иборат аз шаш нафар сарҳади давлатиро ғайриқонунӣ убур намуда, ба қаламрави Тоҷикистон ворид гаштанд. Ҳангоми аз тарафи кормандони агентӣ ва сарҳадбонони тоҷик дастгир шудан онҳо муқобилияти мусаллаҳ нишон доданд. Аз рӯи маълумот, дар натиҷаи задухӯрди мусаллаҳ як нафар қочоқчии афғон захмӣ гардид. Қочоқчиёни боқимонда аз торикии шаб истифода бурда, ба қаламрави Афғонистон фирор намуданд ва захмиро ҳамроҳи худ бурданд.
Дар ҷои ҳодиса кормандони агентӣ ва сарҳадбонони тоҷик гилзаҳои тири силоҳи оташфишон, ду телефони мобилӣ ва як халта бо 12 бастаи маводи қаҳваранги бӯи махсус доштаро дарёфт намуданд.
Мутобиқи хулосаи ташхиси судӣ маводи боздоштшуда афюн буда, вазни он 11 кг 838 граммро ташкил намуд.
Нисбат ба ин ҳодиса аз рӯи моддаҳои 200 қ. 4, 289 қ.2 ва 335 қ. 2 — “Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан ба миқдори махсусан калон, “Қочоқ” ва “Ғайриқонунӣ гузаштан аз сарҳади давлатии Ҷумҳурии Тоҷикистон” парвандаи ҷиноӣ оғоз гардидааст”.
Бино ба иттилои хадамоти матбуоти агентӣ дар айни ҳол дар ҷои ҳодиса тафтиш идома дорад.