Боздошти 1678 иншоот барои вайрон кардани меъёрҳои санитарӣ

Душанбе, 07.01.2015 (АМИТ «Ховар», Лайло Тоирӣ).- Имрӯз дар Вазорати тандурустӣ ва ҳифзи иҷтимоии аҳолӣ барои намояндагони ВАО нишасти матбуотӣ баргузор гардид. Дар нишаст, аз ҷумла иттилоъ дода шуд, ки аз тарафи мутахассисони Хадамоти назорати давлатии санитарию эпидемиологӣ ва зерсохторҳои он дар вилоятҳо ва шаҳру ноҳияҳои ҷумҳурӣ оид ба иҷрои  қоида ва меъёрҳои санитарию эпидемиологӣ дар иншоотҳои зериназоратӣ   санҷишҳо гузаронида шуда, барои вайрон кардани қоида ва меъёрҳои санитарӣ фаъолияти  1678 иншооти  гуногун  муваққатан боздошта шудааст.
Инчунин дар сатҳи ҷумҳурӣ 58156,25 кг маҳсулоти хӯрокворӣ, ки бинобар ба талаботи қоида ва меъёрҳои санитарӣ ҷавобгӯ набудан аз муомилот гирифта шуда, нисбат ба 11689 нафар шахси масъул протокол тартиб дода шуда, ба маблағи   1476538 сомонӣ ҷарима ситонида шудааст.