Бозии “Истиқлол” ва “Эрбил” барои Ҷоми AFC-2015

Душанбе, 15.01.2015. (АМИТ “Ховар”, Ситораи Боймурод).- Бозии нахустини марҳилаи гурӯҳии Ҷоми AFC-2015 байни дастаҳои «Истиқлол”-и Душанбе ва «Эрбил”-и Ироқро ҳакамон аз Ӯзбекистон доварӣ мекунанд.
Тавре ки дар ин бора Кумитаи миллии олимпии кишвар хабар додааст, довари ФИФА Илгиз Танташев аз шаҳри Бухоро сардовари ин бозӣ таъйин шудааст. Ҳусниддин Шодмонов ва Алишер Усмонов ба ҳайси доварони марзи майдон хидмат хоҳанд кард. Шерзод Қосимов вазифаи довари эҳтиётиро бар дӯш дорад. Виктор Колпаков аз Қирғизистон нозири доварон ва Тох Сен Ни аз Малайзия комиссари ин бозӣ таъйин шудаанд.
Гуфта мешавад, ки «Истиқлол” дар Ҷоми АФК-2015 дар гурӯҳи «С” бо дастаҳои «Ал-Қодсия”-и Кувайт, барандаи феълии Ҷоми АФК, «Эрбил”-и Ироқ, финалисти мусобиқаи охирини Ҷоми АФК ва ғолиби плей-офф (Уммон, Туркманистон ва Қирғизистон) рақобат хоҳад кард. 
Бозиҳои гурӯҳи «С” аз 25-уми феврал то 13-уми майи соли равон баргузор мешавад. Аввалин бозии «Истиқлол” бо «Эрбил” 25-уми феврал дар Варзишгоҳи марказии Душанбе барпо мегардад.