«Девон» — и Абулфазли Сират нашр гардид

Душанбе, 03.01.2015. (АМИТ “Ховар”, Ситораи Боймурод).- Бо эҳтимом, пешгуфтор ва таҳияи профессор Матлубаи Мирзоюнус китоби «Девони Абулфазли Сират» аз тариқи нашриёти «Нури маърифат»-и вилояти Суғд дар ҳаҷми 100 саҳифа ба нашр расид.Тавре ки дар ин бора хадамоти матбуоти раиси вилояти Суғд хабар додааст, адиби номвари нимаи дуюми садаи ХIХ Абулфазли Сират, ки дар фазлу дониш ва сухангустарӣ шуҳраи замон буд, вале ба иллати он ки ҷаҳоншиносии эшон ба мафкураи замони шӯравӣ мувофиқ набуд, ин шоир аз назарҳо дур монда ва таълифоташ низ мавриди омӯзиш қарор нагирифтааст. Ҳоло фурсати он расидааст, ки ин давраи нисбатан камтар омӯхташудаи адабиёт дубора мавриди таҳқиқ ва арзишдоварӣ қарор гирад.Дар сарсухани рисола зикр гардидааст, ки Абдулфазли Сират аз адибони хушзавқ ва аз пайравони Бедил маҳсуб меёбад. Дафтари ашъораш бо як сарсухани кӯтоҳи шоир аз ҳаводиси айём маҳфуз монда, дар захираи дастхатҳои шарқии АИ Ҷумҳурии Тоҷикистон зери шумораи 858 нигоҳ дошта мешавад ва аз 77 саҳифа иборат аст. Ин дафтари ашъори Сират аз анвои гуногун: маснавиву қасида, ғазалу қитъа, моддаи таърих ва рубоӣ, муаммову муфрадот иборат аст.Дар «Девони Абдулфазли Сират» қасоид, маснавии «Базми ҳайрат воқеъ дар Шаҳрисабз», ғазалиёт, мутафарриқот, фард, дар ҷавоби фитрат, дар ҳангоми қазовати китоб ба яке аз дӯстон, рубоиёт, таърих, муаммоҳо, рисолаи чиҳил ҳол дар фароиз ва ғайраҳо гирд оварда шудаанд.