Диққати хосса ба таълими кӯдакони дорои имконияти маҳдуд

Душанбе, 05.01.2015. (АМИТ “Ховар”, Ситораи Боймурод).- Вазорати маориф ва илм ба тарбия ва таълими кӯдаконе, ки имконияти маҳдуд доранд, аҳамияти хосса медиҳад, -зикр шуд имрӯз зимни нишасти матбуотии ин вазорат. Дар ҷумҳурӣ 12 кӯдакистони махсуси табобатӣ (санаторӣ) бо фарогирии 3422 нафар кӯдак амал менамояд. Аз ҷумла, дар вилояти Суғд 4 адад ва дар шаҳри Душанбе 8 адад чунин кӯдакистон мавҷуд аст.
Вазорати маориф ва илм ислоҳоти соҳаро аз зина оғоз намуда, барои рушди он, пеш аз ҳама фаъолияти худро дар таҳия ва такмили санадҳои меъёрии ҳуқуқии соҳа амалӣ менамояд. Дар соҳаи таҳсилоти томактабӣ як силсила санадҳои меъёрии ҳуқуқӣ қабул ва дастраси муассисаҳои томактабӣ гардонида шуд. 
Бори аввал дар ҷумҳурӣ Қонуни Ҷумҳурии Тоҷикистон “Дар бораи таълиму тарбияи томактабӣ” дар ҳамкорӣ бо вакилони маҷлиси намояндагони Маҷлиси Олӣ таҳия гардид, ки заминаҳои ҳуқуқӣ, ташкилӣ ва иқтисодии рушди соҳаи томактабиро муайян менамояд,- гуфт вазири маориф ва илми Тоҷикистон Нуриддин Саид имрӯз, 5-уми январ  зимни нишасти матбуотӣ.