Ду корманди АНМН ҷиноят кардааст

Душанбе,  29.01.2015. (АМИТ «Ховар»,  Муқаддас  Темурзода).- «Соли  2014  кормандони  агентӣ 154 ҷинояти  марбут  ба  гардиши  ғайриқонунии  маводи  мухаддирро  ошкор намуда,  981  килограмму 681  грамм  маводи  нашъаовар,  аз ҷумла  52  килограмму  781  грамм  героин,  184  килограмму  894  грамм тарёк  ва 744 килограмму  006 грамм бангдонаро мусодира  карданд. Ғайр аз  ин  ду  ҳодисаи   гардиши  ғайриқонунии  маводи  нашъаовари  сунъӣ ва  моддаҳои  фалаҷкунандаи  асаб  ба  қайд  гирифта, 3 ҳазору  36 дона қурс (таблетка)  — и  маводи  мухаддир  аз гардиши ғайриқонунӣ  бароварда шуд», — гуфт  директори  Агентии  назорати  маводи  нашъаовари  назди Президенти  ҶТ  Рустам  Назарзода дар   нишасти  матбуотӣ.
Рустам  Назарзода  ҳамчунин  зикр  намуд, ки  дар  давраи  ҳисобот  200  парвандаи  ҷиноии  вобаста ба  гардиши  ғайриқонунии  маводи  мухаддир  кушода  шуд, ки   нисбат ба   нишондодҳои  соли  2013  баробари  29  фоиз  зиёд  аст.  Алҳол  103  парвандаи  ҷиноӣ  нисбати ба 155  нафар  гунаҳкорон  ба  суд   ирсол  шудааст. 
«Дар  ин  давра 14  нафар  кормандони   мақомоти ҳифзи  ҳуқуқ  ва  сохторҳои  қудратӣ ҷиноятҳои  марбут ба   гардиши  ғайриқонунии  маводи   мухаддир  содир  намуданд, ки  2  нафарашон  кормандони агентии  мо  мебошанд», — гуфт Рустам  Назарзода.