Фаъолияти муназзами 3589 масҷиди панҷвақта дар кишвар

Душанбе, 06.01.2015. (АМИТ “Ховар”, Фарзонаи Давлат).- Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон барои ба низом даровардани фаъолияти иттиҳодияҳои динӣ ва ҳимояи фазои андешаи динӣ корҳои мушаххасро анҷом додааст. 
Тавре ки дар ин бора Абдураҳим Холиқов, раиси Кумитаи дини Тоҷикистон имрӯз, 6 январ зимни нишасти хабарии хеш иттилоъ дода гуфт, дар айни ҳол дар мақомоти ваколатдори давлатӣ оид ба дин 1 Маркази исломӣ, 48 масҷиди ҷомеи марказӣ, 369 масҷиди ҷомеъ, 3589 масҷиди панҷвақта, 2 адад Кумитаи рушди ҷамоатхонаҳои шиаи имомии исмоилӣ,  72 иттиҳодияи динии ғайриисломӣ, 1 ҷамоатхона, 1 ҷамоаи динии ғайриисломӣ, дар маҷмўъ 4089 иттиҳодияи динӣ ба қайд гирифта шудааст ва ҳамаи онҳо муътадил тибқи талаботи қонун эҳтиёҷоти эътиқодии шаҳрвандонро қонеъ карда  истодаанд. 
Гуфта шуд, ки дар ин давра фаъолияти 1 адад масҷиди ҷомеъ ва 3 адад масҷиди панҷвақтаи расмӣ бо қарори ҳайати муассисон барҳам дода шуд. Ҳамчунин дар ин давра 23 иттиҳодияи динӣ (1 адад ташкилоти динии Кумитаи рушди ҷамоатхонаҳои шиаи имомии исмоилӣ, 1 масҷиди ҷомеи марказӣ, 4 адад масҷиди ҷомеъ ва 17 адад масҷиди панҷвақта) ба қайд гирифта шуд,-иброз дошт А. Холиқов, раиси Кумитаи дини Тоҷикистон имрӯз зимни  нишаст ба хабарнигорон.