Гардиши тиҷорати хориҷӣ дар соли 2014 — беш аз 5 млрд.$

 
Душанбе, 14.01.2015. (АМИТ «Ховар», Фарзонаи Давлат).-Аз рӯи нишондиҳандаҳои омори гумрукӣ ҳаҷми умумии гардиши тиҷорати хориҷӣ маблағи 5 миллиарду 319 млн. доллари амрикоиро ташкил дод, ки ин нишондиҳанда нисбат ба ҳамин давраи соли гузашта 314 млн доллар зиёд мебошад. 
Тавре ки дар ҳисоботи солонаи Хадамоти гумруки назди Ҳукумати Ҷумҳурии Тоҷикистон омадааст, дар соли 2014 воридот 4 млрд-у 340 млн. доллар ва содирот 979 млн. долларро ташкил додааст.
Гуфта мешавад, маҳсулоти нафтӣ ба миқдори 580 ҳазор тонна ва ба маблағи 508 млн доллар ба қайд гирифта шудааст, ки ин нишондод нисбат ба ҳамин давраи соли гузашта 218 ҳазор тонна, ё ин ки 129 млн доллар бештар мебошад. Ҳамчунин дар воридот ҳиссаи бештарро воридоти гандум, воситаи нақлиёт, гази моеъ ва равғани растанӣ ташкил додааст. 
-Дар содирот мавқеи асосиро алюминий ва маҳсулотҳои он, пахта ва маҳсулоти меваю сабзавот ташкил додааст,- гуфт Неъматбой Раҳматов, муовини сардори Хадамоти гумрук имрӯз, 14-уми январ дар нишасти хабарӣ ба хабарнигорон.