Хуҷанд: Таъмири 100 км роҳ дар соли 2014

Хуҷанд, 02.01.2015. (АМИТ “Ховар”, Абдуаҳад Шарифзода).-Дар маркази вилояти Суғд- шаҳри Хуҷанд соли сипаригашта наздик ба 100 км роҳҳое, ки аҳамияти  минтақавиву маҳаллӣ доштанд, аз таъмир бароварда шуданд. 
Тавре ки ба АМИТ “Ховар” аз Идораи таъмиру роҳсозии шаҳри Хуҷанд иттилоъ доданд, дар соли 2014  аз тарафи кормандони идораи мазкур роҳҳои ҳудуди шаҳр дар умум ба масоҳати 96,8 км, аз ҷумла 43,7 км аз таъмири асосӣ ва 53,1 км аз таъмири ҷорӣ бароварда шуда,  ба миқдори  умум 2332,9 тонна асфалт хобонида шудааст. 
Ба иттилои манбаъ, дар ин самт инчунин 2000 метри квадратӣ роҳҳои пиёдагард сафолакпӯш шуда, ба маблағи 249 ҳазор сомонӣ корҳои рангубори ҳошия (бардюр), кашидани хатти уфуқӣ ва аломатгузории роҳҳо ба сомон расонида шуд.
Бояд гуфт, ки дар ин раванд дар  доираи иҷрои барномаи вилоятии «Соли 2014-соли роҳҳои обод»  дар қаламрави вилояти Суғд  ба ҷои 2350 км  роҳҳои ба нақша гирифта шуда,  дар маҷмӯъ дар масоҳати  2826,4 км роҳҳои мошингард таъмиру тармим шуданд, ки дарозии роҳҳои мумфаршшуда нисбат ба ҳамин давраи соли 2013- 2,8 маротиба зиёд аст.