Иҷлосияи ғайринавбатии Маҷлиси миллии МО ҶТ

Душанбе, 24.01.2015 (АМИТ «Ховар»).- 24 январи соли 2015 тибқи Фармони Президенти Ҷумҳурии Тоҷикистон №329 аз 19 январи соли 2015 «Дар бораи даъвати иҷлосияи ғайринавбатии Маҷлиси миллии Маҷлиси Олии Ҷумҳурии Тоҷикистон даъвати чорум» таҳти раёсати Маҳмадсаид Убайдуллоев иҷлосияи ғайринавбатии Маҷлиси миллии Маҷлиси Олии Ҷумҳурии Тоҷикистон даъвати чорум баргузор гардид, ки дар он аъзои Маҷлиси миллӣ бо интихоби котибот ба баррасии 2 масъалаи дар он шомилгардида, шуруъ намуданд. 
Тавре Ёвари Раиси Маҷлиси миллӣ Шавкат Саидов иттилоо дод, дар иҷлосия аъзои Маҷлиси миллӣ пешниҳодоти Президенти мамлакатро дар бораи додани ризоият барои аз вазифаи Прокурори генералии Ҷумҳурии Тоҷикистон  озод намудани Салимзода Шерхони Одина ва ба ин вазифа таъин намудани  Раҳмонов Юсуф Ахмедович, ҷонибдорӣ намуданд. 
Маҳмадсаид Убайдуллоев нисбати фаъолияти анҷомдодаи Салимзода Шерхони Одина ба ҳайси Прокурори генералии Ҷумҳурии Тоҷикистон ва ҳамкориҳои мутақобила дар самти назорати риояи якмароми сандаҳои меъёрии ҳуқуқӣ, таъмини волоияти қонун ва таҳкими фазои ҳуқуқии кишвар аз номи Маҷлиси миллӣ изҳори миннатдорӣ карда, дар фаъолияти минбаъдаи мавсуф ва Прокурори нави генералии кишвар  барору комёбиҳо орзу намуд.
Дар фарҷом Маҳмадсаид Убайдуллоев  аз аъзои Маҷлиси миллӣ ва кулли иштирокчиёни иҷлосия давъат ба миён овард, ки дар татбиқи нишондодҳои Паёми  ироагардидаи Президенти  мамлакат ба Маҷлиси Олии Ҷумҳурии Тоҷикистон беш аз ҳарвақта баҳри фароҳам овардани шароитҳои арзанда барои инкишофи озодонаи аҳли ҷомеа тадбирҳои муассир андешанд.