Иштироки ҷавонони точик дар Ҷоми Иттиҳод-2015

Душанбе, 06.01.2015. (АМИТ “Ховар”, Ситораи Боймурод).- Алишер Тӯхтаев, сармураббии мунтахаби ҷавонони  футболи Тоҷикистон (U-21), бозингаронеро, ки барои ширкат дар Ҷоми Иттиҳод-2015 ба Санкт-Петербурги Русия мераванд, номбар кард. Ба ҳайати ниҳоии даста 19 футболбоз — 2 дарвозабон, 7 ҳимоятгар, 6 нимҳимоятгар ва 4 ҳамлагар дохил аст.
Ба иттилои Федератсияи футболи кишвар, дастаи мунтахаби ҷавонони футболи Тоҷикистон (U-21) дар мусобиқаи XXIII байналмилалии Ҷоми Иттиҳод-2015, ки аз 16-ум то 25-уми январи соли равон бо ширкати 12 даста дар Маҷмааи варзишию фарҳангии «Петербургский»-и шаҳри Санкт-Петербурги Русия баргузор мегардад, дар гурӯҳи «С” бо дастаҳои Африқои Ҷанубӣ, Литва ва Қазоқистон рақобат хоҳад кард. 
Гуфта мешавад, ки мунтахаби ҷавонони Тоҷикистон нахустин бозиашро 17-уми январ бо дастаи Қазоқистон, бозии дувумашро 18-уми январ бо тими  мунтахаби Африқои Ҷанубӣ ва бозии севумашро 20-уми январ бо дастаи Литва анҷом медиҳад.