«Луғати тиббӣ» — дастоварди беҳтарини ДДТТ

Душанбе,  12.01.2015. (АМИТ «Ховар»,  Фарзона  Достонзода).- «Рӯи  чоп  омадани  асари  илмӣ —  луғати  дуҷилдаи  тиббӣ  дастоварди  муҳими  кормандони  Донишгоҳи  давлатии  тиббии  Тоҷикистон ба номи Абуалӣ  ибни  Сино дар  соли  2014  маҳсуб меёбад», —  зикр  шуд  дар  ҷараёни  нишасти  матбуотӣ, ки  имрӯз,  12  январ,  дар  шаҳри  Душанбе  баргузор  гардид. 
Дар  ҷараёни  нишасти  матбуотӣ   зикр  шуд, ки   луғати тиббӣ  60 000  истилоҳотро дар  бар  гирифта,  дар  он  баробари   истилоҳоти   имрӯзаи тиббӣ  теъдоди   зиёди  вожаҳои  тибби  қадим  оварда шудааст. Бартарияти луғати  мазкур   он  аст, ки   дар  он   номҳои лотинии  истилоҳот ва  имлои  дурусти  онҳо  дар  алифбои  форсӣ   тавзеҳ дода шудааст. 
Луғати тиббӣ  ба  беҳдошти   илми тиб  ба  забони давлатӣ  мусоидат  карда, китоби  рӯимизии   кормандони  соҳаи  тандурустӣ  ба  шумор  меравад.