Мақсад-ободонии маҳали зист

Мӯъминобод, 20.01.2015. (АМИТ «Ховар», Сулаймони  Хол).-Дар ноҳияи Мӯъминобод  кормандони ташкилоту идораҳо ва сокинон дар марказ  ва деҳоти ноҳия ба ҳашар баромада, дар шафати роҳҳои мошингард беш аз 600 бех ниҳоли  ороишию сояафкан  ва мевадиҳанда шинонида, дар баробари ин   баҳри сабзиши хуби дарахтон бехи дарахтонро нарм карданд.
Дар ҳашар дар баробари дигар ташкилоту муассисаҳо  чавонони ноҳия  бо ҳисси баланди ватандӯстӣ  фаъолона ширкат варзиданд. Ба қавли Абдулло Раҷабов, мудири бахши ҷавонон, варзиш ва саёҳии ноҳия дар ноҳияи Мӯъминобод саҳми ҷавонон дар корҳои ободонию созандагӣ назаррас буда, соле қабл бо ташаббуси ҷавонон боғи намунавӣ бунёд гардид. Имсол низ онҳо  иқдом гирифтаанд, ки то анҷоми маъракаи ниҳолшинонӣ барои хуррам гардонидани маҳали зист    дар ин тадбир дастаҷамъона иштирок намоянд.