Медали тиллои хонандаи тоҷик аз озмуни ҷаҳонӣ

Душанбе, 20.01.2015. (АМИТ «Ховар»). — Шогирди синфи 11-и Гимназия-интернати Тоҷикистону Русия «Ҳотам ва ПВ» аз олимпиадаи байнимактабии физикию математикии беҳтарини ҷаҳон, ки аз 11 то 17 моҳи январ дар шаҳри Алмаато баргузор гардид, аз барномасозӣ бо медали тилло баргашт. Дар олимпиада 58 даста ва 393 хонанда ширкат варзид. Аз Тоҷикистон 4 даста: 2 даста аз литсейҳои муштараки тоҷикию туркӣ, 1 даста аз литсейҳои президентӣ ва 1 даста аз Гимназияи «Ҳотам ва ПВ » ширкат варзид.  Ин бори дуюм аст, ки мактаббачагони точик дар ҳамин олимпиадаи бонуфуз сазовори медали тилло мегарданд. Бори аввал медали тиллоро барои Тоҷикистон 5 сол қабл шогирди ҳамин гимназия Афзали Беҳрӯз  ба даст оварда буд, ки ҳоло дар магистратураи Донишгоҳи технологияҳои информатсионӣ, механика ва оптикаи шаҳри Санкт-Петербург, ки аз ҷиҳати баромасозӣ донишгоҳи беҳтарини ҷаҳон ба ҳисоб меравад, таҳсил карда, ҳамзамон дар ширкати Яндекс кор мекунад.