Муроҷиати беш аз 66 ҳазор шаҳрванд ба Хадамоти муҳоҷират

Душанбе, 09.01.2015 (АМИТ «Ховар», Лайло Тоирӣ).- Дар давоми соли 2014 ба Хадамоти муҳоҷират ва сохторҳои он  барои гирифтани маслиҳат  66 ҳазору 587  нафар муроҷиат намуд, ки ин нишондод дар соли 2013 танҳо 15 ҳазору 481 нафарро ташкил дода буд.  Ин нукта 8 январ дар ҷамъбасти фаъолияти Хадамоти муҳоҷират дар соли 2014 зикр гардид.
Аз ин шумора  ба таври шифоҳӣ 59 ҳазору 505 нафар, хаттӣ 789 нафар ва телефонӣ 6 ҳазору 289 нафар шаҳрванд муроҷиат кардааст. Қисмати зиёди шаҳрвандон асосан доир ба манъи вуруд ба Русия  муроҷиат намудаанд. 
Дар давраи ҳисоботӣ ҳангоми санҷиш  манъи вуруди 11 ҳазору 863 нафар шаҳрванди кишвар ба Федератсияи Русия ошкор гардид.
“Ба Хадамоти муҳоҷират аз 1 августи соли ҷорӣ то айни замон 140 нафар донишҷӯи кишварамон, ки дар донишгоҳҳои Федератсияи Русия, Беларус ва Украина дар басти рўзона  таҳсил менамоянд ва 496 нафар шаҳрванд, ки вурудашон ба Федератсияи Русия ва тавассути ФР ба ин кишварҳо манъ гардида буд, муроҷиат намуд”,- гуфт сухангӯи хадамот Абдуллоҳи Қодирӣ.  
Дар натиҷаи кори Вазорати меҳнат муҳоҷират ва шуғли аҳолӣ,  барои 62 нафар иҷозати вуруд ба ФР дода шуда, дар айни замон аризаи 78 нафар дар марҳилаи баррасӣ қарор дорад. Ҳамчунин 2 нафар шаҳрванди Тоҷикистон вобаста ба якҷояшавии оила  иҷозати  вуруд ба ФР гирифтанд.