Нахустнамоиши филми «Комил»

Душанбе,  16.01.2015. (АМИТ «Ховар»,  Марҳабои  Азамат).- Бо  ибтикори  сафорати Ҷумҳурии  Тоҷикистон  дар  Федератсияи  Русия 20  январ дар «Хонаи русҳои хориҷӣ  ба  номи  Солженитсин» — и  шаҳри  Маскав нахустнамоиши  филми  мустанади   коргардони маъруфи  тоҷик  Сафарбек  Солиев  «Комил»  баргузор  мегардад. 
Дар  ин  бора   намояндаи  расмии  сафорати  Тоҷикистон  дар  Федератсияи  Русия  Муҳаммад  Эгамзод ба  АМИТ «Ховар»  хабар  дод. 
Мувофиқи  суханони  манбаъ, филм  дар  бораи ҳаёту  эҷодиёти  коргардони машҳури  шӯравӣ, аввалин донишҷӯи Донишкадаи  давлатии кинематографияи шӯравӣ  аз Осиёи  Марказӣ,  фарзанди  бузурги  халқҳои  бародари Тоҷикистону  Ӯзбекистон Комил  Ёрматов  нақл  мекунад. 
Ба  гуфтаи  муаллифи  филм,  Комил  Ёрматов  яке  аз  аввалин  кадрҳои  миллии  Осиёи  Марказӣ  буд, ки  дар Донишкадаи  давлатии  кинематографияи  шӯравӣ  таҳсил  карда, ба  рушди  кинематографии  Тоҷикистону  Ӯзбекистон  ҳиссаи  сазовор  гузоштааст. Комил  Ёрматов филмҳои  машҳури «Алишер  Навоӣ», «Ибни  Сино», «Тӯфони  фазои  Осиё», «Сарбозони  инқилоб», «Ҳалокати Консули  сиёҳ» ва бисёр  филмҳои  дигарро  ба  навор  гирифтааст. 
«Ба  тамошои  филми «Комил» сафирон ва  кормандони  дигари  корпуси  дипломатии  муқими  Маскав,  намояндагони  зиёиёни  эҷодкор, ҳамчунин  ҷамоаҳои тоҷикону  ӯзбекон воқеъ  дар  Русия  даъват  шудаанд», —  гуфт Муҳаммад  Эгамзод.