Нашъаҷаллобони пеш судшуда боздошт гардиданд

 Душанбе, 29.01.2015. (АМИТ “Ховар”, Мавҷуда Анварӣ).- Шабонарӯзи гузашта кормандони Агентии назорати маводи нашъаовари кишвар дар минтақаҳои мухталифи ҷумҳурӣ се нуқтаи фурӯши маводи нашъаоварро нобуд сохта, нашъаҷаллобонро боздошт намуданд.
Кормандони Раёсати агентӣ  дар вилояти Хатлон дар ҳудуди шаҳри Кӯлоб сокини маҳаллиро бо бастаи героин боздошт намуданд, ки ӯ қаблан ду маротиба суд шудааст.
Аз тарафи кормандони Раёсати агентӣ дар вилояти Суғд дар ҳудуди шаҳри Панҷакент бо гумони даст доштан дар муомилоти ғайриқонунии маводи нашъаовар ду сокини маҳаллӣ  дастгир шуд, ки аз онҳо маводи нашъаовари афюн ошкор ва мусодира гардид. Ҳангоми гузаронидани тафтиш муайян гардид, ки як боздоштшуда якчанд сол қабл дар қаламрави кишвари ҳамсоя барои даст доштан дар муомилоти ғайриқонунии маводи нашъаовар суд шудааст.
Кормандони Раёсати агентӣ дар шаҳри Душанбе сокини ноҳияи Рӯдакиро боздошт намуданд, ки аз ӯ дар дохили мошини “ Opel Astra” афюн ошкор ва мусодира гардид. Ин боздоштшуда низ қаблан бо моддаи 147 КҶ ҶТ суд шудааст.