Навсозиҳои роҳҳои оҳан дар кишвар

Душанбе, 30.01.2015. (АМИТ “Ховар”, Рафоати Абдулҳамид).- Корхонаи воҳиди давлатии «Роҳи оҳани Тоҷикистон» тибқи нақша ва мувофиқ ба имкониятҳои дошта шурӯъ аз соли 2014 тасмим гирифт, ки тамоми истгоҳҳои роҳи оҳани дар ҳудуди мамлакат мавҷуд бударо аз таъмири куллӣ бароварда, барои кормандону мутахассисони соҳа шароити  хубтари фаъолиятро муҳайё созад. 
Бино ба иттилои ВКД «Роҳи оҳан», бо талошу дастгириҳои Ҳукумати мамлакат солҳост, ки маркази чумҳурӣ- шаҳри Душанбе бо вилоятҳои Суғду Хатлон  пайванди роҳи оҳан дорад. Барои дар ҳолати омодабош қарор доштани роҳи оҳан ва ҳаракати бехатари қатора, истгоҳҳо нақши калидӣ мебозанд. Бо назардошти ин масъала роҳбарияти корхонаи мазкур тасмим гирифт, ки тамоми истгоҳҳои минтақаҳои Душанбе, Суғд ва Хатлонро, ки аз тариқи онҳо қатора ҳаракат мекунад, таъмиру навсози намояд. 
Гуфта мешавад, дар соли равон тибқи ин нақша бинои вокзали шаҳри Кӯлоб ва истгоҳи ноҳияи Восеи вилояти Хатлон навсозӣ шуданд.