Ошкоршавии ҷинояти куштор дар Бохтар

Душанбе, 27.01.2015. (АМИТ «Ховар», Муқаддас Темурзода).- Дирӯз зимни гузаронидани чорабиниҳои фаврӣ-ҷустуҷӯӣ аз ҷониби кормандони милитсия шаҳрванд Рамазон Абдуллоев, соли таваллудаш 1995, истиқоматкунандаи шаҳри Сарбанд бо гумони содир намудани ҷинояти куштор дастгир гардид. 
Тибқи иттилои ВКД ҶТ, дастгиршуда 24-уми январи соли ҷорӣ, тақрибан соати 22.00 дақиқа дар назди тарабхонаи Муниса, воқеъ дар ноҳияи Бохтар бо бародарон Анвар Сафаров, соли таваллудаш 1988 ва Дилшод Сафаров, соли таваллудаш 1989, сокинони ноҳияи Бохтар ҷанҷол намуда, бо мақсади аз ҳаёт маҳрум сохтан бо корди хоҷагӣ ба узвҳои бадани номбурдагон зарба зада, аз ҷойи ҳодиса ғайб задааст. Дар натиҷа Анвар Сафаров ҷароҳати  вазнини ҷисмонӣ бардошта, дар беморхона ба ҳалокат расидааст. Дилшод Сафаров ҷароҳати ҷисмонӣ бардошта, дар беморхона бистарӣ гардидааст. 
Далели шайъӣ  гирифта шуд.  Нисбат ба ҳодисаи мазкур парвандаи ҷиноятӣ оғоз гардида,  тафтиш идома дорад.