Панҷакент: дастовардҳо назаррасанд

Панҷакент, 07.01.2015. (АМИТ «Ховар», Гулбаҳори Худойбердӣ).- Имрӯз дар мақомоти иҷроияи ҳокимияти давлатии шаҳри Панҷакент  бо ширкати хабарнигорони маҳалливу ҷумҳуриявӣ нишасти матбуотӣ баргузор гардид. Раиси шаҳри Панҷакент Хисрави Абдуназар аз фаъолияти соҳаҳои мухталифи хоҷагии халқи шаҳр тӯли  соли равон гузориш дода, аз ҷумла гуфт: «Дар соли 2014 ба буҷет аз ҳисоби андозҳо ва андози иҷтимоии ғайрибуҷетӣ 158 миллиону 676 ҳазор сомонӣ маблағ ворид шудааст, ки ин нисбат ба ҳамин давраи соли сипарӣ 9 миллиону 526 ҳазору 52 сомонӣ бештар буда, назар ба нақшаи пешбинишуда 19 миллиону 864 ҳазору 423 сомонӣ кам ё баробари 88, 9 фоиз аст. Дар давраи ҳисоботӣ аз 11 сарчашмаи воридоти андозҳо иҷрои 4 намуди он пурраву барзиёд таъмин гардида, аз ҳисоби иҷро нашудани нақшаи воридотӣ 7 намуди андозҳо ба буҷет 28 миллиону 77 ҳазору 26 сомонӣ кам маблағ ворид гардидааст». 
-Феълан мо аз натиҷаҳои истеҳсолии аксари идораву ташкилотҳо, хоҷагиву корхонаҳои ҳудуди шаҳр қаноатмандем, агарчи дар баъзе самтҳои хоҷагидории мо норасоиҳо  ба чашм мерасанд. Мекӯшем, ки дар давоми соли 2015 онҳо бартараф шаванд ва ба натиҷаҳои беҳтаре ноил бигардем,-афзуд  Хисрави Абдуназар.
   Дар қатори дигар масоил раиси шаҳр ба масъалаи навсозии фурудгоҳи шаҳри Панҷакент дар ҳамкорӣ бо ҶДММ Корхонаи муштараки «Зарафшон» ба маблағи 1 миллиону 672 ҳазор сомонӣ навсозии бинои асосӣ ва бо таҷҳизоти замонавӣ таъмин намудани фурудгоҳ сухан гуфт.