Панҷакент: Муваффақиятҳои Коллеҷи тиббӣ

    Панҷакент, 24.01.2015. (АМИТ «Ховар», Гулбаҳори Худойбердӣ).-  Дирӯз дар Колеҷи тиббии шаҳри Панҷакент бо иштироки як гурӯҳ рӯзноманигорон нишасти матбуотӣ баргузор гардид. Дар нишаст Муҳаббат Собирова, директори муассиса гуфт: «Дар таълимгоҳ 30 синфхона, 16 кабинети фаннӣ, 1 озмоишгоҳ, ду дарсгоҳи компютерӣ, толори маҷлисӣ, китобхона, майдончаи варзишӣ, ошхона мавҷуд аст. Дарсгоҳҳо ва кабинетҳои фаннӣ бо овезаҳо, гӯшаҳо, корҳои эҷодии донишҷӯён ва омӯзгорон таҷҳизонида шудаанд. Таъминоти китобхона бо адабиёти таълимӣ-методӣ, тахассусӣ ва илмӣ  аз самтҳои асосӣ маҳсуб мегардад, ки маъмурияи таълимгоҳ ба он таваҷҷуҳи махсус зоҳир менамояд. Қироатхона 50 ҷои нишаст дошта, 4466 адад китоби тахассусӣ (методию дарсӣ), 2039 адад китоби бадеӣ ҷиҳозонида шудааст».
Дар нишаст зикр шуд, ки дар соли 2014 таълимгоҳро 211 нафар донишҷӯ хатм намуд, ки аз инҳо 20 нафараш дорои дипломи аъло мебошад.