Пардохти 4,3 млн. сомонӣ маблағҳои андӯхти нафақавӣ

Душанбе,13.01.2015. (АМИТ «Ховар», Раъно Нусратуллозода).- Дар соли 2014 нақшаи андози иҷтимоии инфиродӣ 89,5 фоиз таъмин  шуда, ба буҷети агентӣ 69 миллион сомонӣ ворид гардид, ки нисбат ба соли 2013 9,3 млн. сомонӣ ё 15,6 фоиз зиёд мебошад. Ин матлабро дирӯз Назокат Одинаева, муовини аввали директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон ба хабарнигорон дар ҷамъбасти солонаи фаъолияти агентӣ иброз дошт. 
Назокат Одинаева афзуд, ки барои гирифтани маблағҳои андӯхти нафақавӣ 14 ҳазору 361 нафар муроҷиат намудааст. Дар ин давра ба 14 ҳазору 441 нафар тавассути Бонки давлатии амонатгузории Ҷумҳурии Тоҷикистон «Амонатбонк» дар ҳаҷми 4,3 млн. сомонӣ маблағҳои андӯхти нафақавӣ пардохта шуд, ки аз ин шумора аризаҳои 1 ҳазору 91 нафараш дар охири соли 2013 ворид гардидааст. Ҳамчунин дар ин давра 1 ҳазору 11 ариза бинобар мувифиқат накардани ҳуҷҷатҳо бозпас гардонда шудааст.