Полки комендантӣ ва саҳми назарраси он

Душанбе, 05.01.2015 (АМИТ «Ховар», Лайло Тоирӣ).- Соли 2014 барои Полки комендантии Вазорати мудофиа  соли бобарор ва пур аз навгониҳо буд. Ба иттилои хадамоти матбуоти Вазорати мудофиаи ҶТ, зимни натиҷагирӣ аз дастовардҳои соли гузашта зикр шуд, ки ҳайати шахсии полки мазкур дар чандин чорабиниҳои сатҳи ҷумҳриявӣ ва дохили Вазорати мудофиа ширкати фаълона карда, вазифаҳои соҳавии хешро дар сатҳи баланд иҷро намуданд. Илова бар ин, зикр гардид, ки ҳайати шахсии полк, вазифаҳои он қабулу гусели меҳмонони олиқадр, ки бо сафарҳои расмӣ ба Тоҷикистон меоянд, дар пешвози роҳбарони чандин кишвари ба мо дӯст саҳмгузорӣ намудаанд.
Ба зами ин, нигоҳ доштани тартибот дар самти пӯшидани либоси низомӣ аз ҷониби хизматчиёни ҳарбӣ, тақвият бахшидани фаъолияти Оркестри ҳарбӣ-нафасӣ ва иҷрои дигар вазифаҳои ҷангӣ аз корҳое мебошанд, ки дар соли равон дар сатҳи зарурӣ амалӣ шудаанд.
Дар охири ҷамъомад афсарону сарбозони взводу ротаҳои беҳтарини Полки мазкур аз ҷониби масъули қисми низомии мазкур бо туҳфаҳои хотиравӣ сарфароз гардиданд. Қобили зикр аст, ки Полки комендантии Вазорати мудофиа, соли 1993 дар заминаи Комендатураи ҳарбӣ таъсис ёфта, дар миёни дигар ҷузъу томҳои навъҳои Қувваҳои Мусаллаҳ аз қисмҳои низомии намунавӣ ба ҳисоб меравад. Дар ҳайати Полки мазкур аксаран афсарони дорои маълумоти олӣ хизмат намуда, уҳдадориҳои худро сари вақт ва бо сифати баланд иҷро менамоянд ва доим аз ҷониби ҳайатҳои роҳбариву фармондеҳии Вазорати мудофиа сазовори баҳои аъло мегарданд.