Раиси нави «Тоҷикматлубот»

Душанбе, 16.01.2015. (АМИТ «Ховар», Бекназари Абӯбакр). — «Сироҷиддин Валиев бо сабаби ба нафақа баромадан аз вазифаи раиси Раёсати Иттифоқи «Тоҷикматлубот» озод ва Ҳусейн Идиев ба ин вазифа таъйин гардид», — иттилоъ дод 16 январ дар нишасти матбуотӣ муовини раиси Раёсати Иттифоқи «Тоҷикматлуот» Гулнора Кокова.
Ёдовар мешавем, ки Идиев Ҳусейн Сафаралиевич 4 октябри соли 1964 таваллуд шуда, Донишгоҳи давлатии миллии Тоҷикистонро бо ихтисоси иқтисодчӣ хатм кардааст.
Ӯ фаъолияти меҳнатиашро соли 1985 оғоз карда, то соли 1999 дар вазифаҳои гуногун дар Трест «Кулябводстрой», корхонаҳои бахши комуналӣ ва ҶСК «Нафтрасон» фаъолият кардааст. Аз 1999 то соли 2003 роҳбарии шӯъбаҳо ва департаментҳои гуногуни ҶСК «Ориёнбонк»-ро бар дӯш дошт. Аз соли 2003 то соли 2004 муовини раиси «Ориёнбонк», аз соли 2004 то соли 2007 директори филиали «Ориёнбонк» дар ноҳияи Шоҳмансури шаҳри Душанбе ва солҳои 2007-2012 директори филиали «Ориёнбонк» дар вилояти Суғд кор кардааст. 
Ҳусейн Идиев бо Қарори Ҳукумати Ҷумҳурии Тоҷикистон аз 12 ноябри соли 2012 то ин дам дар мақоми директори Агентии хариди давлатии мол, кор ва хизматрасонии назди Ҳукумати Ҷумҳурии Тоҷикистон фаъолият дошт.