Шартномаҳои ҳамкорӣ бо 201 корфармо

Душанбе, 15.01.2015 (АМИТ «Ховар», Лайло Тоирӣ).- Барои омўзиш ва бозомўзии касбӣ, дар соли 2014 ба101 ҳаз. 116 нафар шаҳрванди бекор, корҷўй ва муҳоҷири меҳнатӣ ба тайёрии касбӣ, такмили ихтисос, бозомўзӣ ва шаҳодатномакунонии малакаҳои касбӣ фаро гирифта шуданд, ки 101,0 фоизи нақшаи солонаро ташкил медиҳад. Дар ин бора имрӯз дар ҷараёни нишасти матбуотӣ вазири меҳнат, муҳоҷират ва шуғли аҳолӣ иттилоъ дод. 
Дар ин давра КВД “Маркази таълимии шаҳри Душанбе” дар ҳамкорӣ бо Кумитаи кор бо занон ва оилаи назди Ҳукумати Ҷумҳурии Тоҷикистон 60  нафар  ятимдухтар,  ноболиғони  гирифтори хушунат ва зўроварӣ мебошанд, ба омўзиши касбҳои “Қаннод” (20 нафар), “Дўзанда” (20 нафар)  ва “Асосҳои омўзиши компютер” (20 нафар) ҷалб намуд.
Дар муассисаҳои таълимии системаи Агентии меҳнат ва шуғли аҳолии вазорат 8752 нафар занону духтарони хонашин ба омўзиши касбҳои «Қолинбоф», “Қуроқдўз”, “Бофанда”, “Гулдўз” ва “Сўзанидўз” ҷалб гардиданд.
Дар доираи «Барномаи давлатии мусоидат ба шуғли аҳолии Ҷумҳурии Тоҷикистон барои солҳои 2014-2015» бо 201 корфармо шартномаҳои тарафайн баста шуда, ба 4685 нафар  бекори дар қайди мақомоти давлатии шуғли аҳолӣ буда, ба корҳои ҷамъиятӣ фаро гирифта шуд, ки нисбат ба пешгўии барнома 100,1 фоизро ташкил намуд. 
Бино ба гуфтаи вазир дар низоми вазорат 61 муассисаи таҳсилоти ибтидоии касбӣ, аз ҷумла “Коллеҷи муҳандисӣ-омўзгории шаҳри Душанбе” фаъолият менамояд.
Муассисаҳои таҳсилоти ибтидоии касбӣ имрўз аз рўи 14 самт ва 94 ихтисос барои иқтисодиёти миллӣ мутахассис тайёр менамояд.
“Дар муассисаҳои таълимии мазкур 23550 хонанда таҳсил менамояд. Теъдоди омўзгорон 1346 нафар ва устоҳои таълимӣ истеҳсолӣ 1043 нафарро ташкил менамоянд.
Тавассути курсҳои кўтоҳмуддат дар соли 2014 дар муассисаҳои таҳсилоти ибтидоии касбӣ 12 415 нафар шаҳрванд ба касбомўзӣ ҷалб шуд”,-хабар дод С.Тағойзода.