Шумораи кӯдакистонҳо меафзояд

 
Душанбе,  06.01.2015. (АМИТ «Ховар», Марҳабои  Азамат ).- Соли  2014 теъдоди  кӯдакистонҳои  кишвар  баробари  19  адад  афзуда,  ба 527  адад  расид. Соли  2013 ин  нишондиҳанда 508  ададро ташкил  медод. 
Дар  ҷараёни   нишасти  матбуотии  Вазорати  маорифи  ҶТ, ки 5  январ  дар  шаҳри  Душанбе баргузор гардид,  дар  ин  бора  хабар дода шуд.
Ба  гуфтаи  вазири  маориф ва илми  ҶТ  Нуриддин Саид, тайи  соли  гузашта дар  вилояти  Хатлон  8 кӯдакистон,  вилояти  Суғд  9,   шаҳри  Душанбе  1    ва  дар  ноҳияи  Ҳисор  1  кӯдакистон  бунёд  шуд.
Шумораи  кӯдакони  муассисаҳои томактабӣ 80  ҳазору  442  нафарро ташкил  дод, ки  нисбат ба  соли  гузашта баробари 4  ҳазору  72  нафар  зиёд  аст. 
«Баъди  роҳандозии  қарори  Ҳукумати Ҷумҳурии  Тоҷикистон «Дар  бораи тасдиқи  Барномаи  давлатии  рушди  соҳаи  таҳсилоти томактабӣ  барои  солҳои 2012 — 2016  дар Ҷумҳурии  Тоҷикистон» теъдоди  муҳассилини  марказҳои рушду  камолоти кӯдак хеле  афзуда, ба  1  ҳазору  60  нафар  расид. Соли  2013  теъдоди   кӯдакони  муассисаҳои  зикршуда 710  нафарро  ташкил дода буд», —  гуфт  Н.Саид.
Вазири  маориф  зикр  намуд, ки  дар  бахши  таълими  томактабӣ  бархе  санадҳои  меъморию  ҳуқуқӣ  қабул  ва  дастраси   муассисаҳои томактабӣ  шуданд. 
«Бори нахуст  дар  ҷумҳурӣ  якҷоя бо  вакилони  Маҷлиси  намояндагони  Маҷлиси  Олӣ Қонуни  Ҷумҳурии  Тоҷикистон  «Дар  бораи таҳсилу тарбияи   томактабӣ»  таҳия  гардид, ки  асосҳои  ҳуқуқӣ  ва   ташкилию  иқтисодии  рушди  соҳаи  томактабиро  муайян  мекунад», —   афзуд  Вазир.
Н.Саид  Вай  изҳор  дошт, ки  алҳол  дар  ҷумҳурӣ 34  кӯдакистони  шахсӣ фаъолият  дорад. 
«Теъдоди  умумии кӯдакистонҳои  шахсӣ  нисбат ба  соли  2013  баробари  11  адад  афзуд, ки дар  онҳо  2  ҳазору  430  нафар  кӯдакон  тарбия  меёбанд  ва таҳсил  мекунанд. То  имрӯз  дар  ҳамаи  муассисаҳои  томактабии   шахсӣ  10  ҳазору  960  нафар  кӯдакон  тарбия  мешаванд», —  гуфт  вазир.