Сохтмони кӯпрук дар деҳаи Баҳористон

Кӯлоб, 21.01.2015. (АМИТ «Ховар», Сулаймони Хол).-Дар доираи корҳои ободониву бунёдкорӣ  дар шаҳру навоҳии минтақаи Кӯлоб сохтмони  кӯпрук ва таъмири иншооти маданиву маишӣ бомаром ҷараён дорад. Дар ҳамин замина дар деҳаи Баҳористони ҷамоати деҳоти Даҳанаи ноҳияи Кӯлоб бо маблағгузории соҳибкор Бекмурод Ганҷалов ба тарики ҳашар сохтмони кӯпруки калони мошингузар ба анҷом расид, ки дар сохтмони он маблағи 25 ҳазор сомонӣ масраф гардид. Дар деҳаи мазкур беш аз 385 нафар истиқомат менамояд ва барои ба маркази шаҳр рафтан маҷбур буданд масофаи 4 километрро тай намоянд. Дар айни замон бо сохтани пули мазкур имкони равуои сокинон ба маркази шаҳр осонтар гардид.  
Ҳамчунин дар деҳаи Гулободи ҷамоати мазкур бо дастгирии соҳибкор Раҳмоналӣ Файзалиев сохтмони айвон барои нигоҳдории хезум ва аз ҳисоби кумитаи маҳала таъмири се синфхонаи филиали мактаби таҳсилоти миёнаи умумии № 17 идома дорад.