Соли 2014 -соли бобарор барои ДТТ

 
Душанбе, 12.01.2015. (АМИТ “Ховар”, Ситораи Боймурод).- Соли сипаришуда барои мардуми Тоҷикистон ва ҳам барои кормандони Донишгоҳи техникии Тоҷикистон ба номи академик М.С. Осимӣ соли  хотирмон буд.  Таҷлили ҷашнҳои 20-солагии Конститутсияи Ҷумҳурии Тоҷикистон, 90-солагии шаҳри Душанбе ҳамчун пойтахти Ҷумҳурии Тоҷикистон, баргузории Саммити сарони давлатҳои аъзои Созмони ҳамкориҳои Шанхай бори дигар исбот намуд, ки халқи тоҷик метавонад чорабиниҳои муҳимро дар сатҳи баланд амалӣ намояд,- гуфт Ҳайдар Одинаев,  ректори Донишгоҳи техникии Тоҷикистон ба номи академик М.С. Осимӣ имрӯз, 12-уми январ зимни нишасти матбуотӣ.
Ҳоло дар сохтори асосии донишгоҳ 9 факултет, 49 кафедра аз рӯи 60 ихтисос мутахассисони дараҷаи бакалавр, маълумоти олидор ва магистрҳоро тайёр менамоянд. Дар сохтори донишгоҳ Донишкадаи политехникӣ дар шаҳри Хуҷанд ва Коллеҷи техникӣ дар шаҳри Душанбе фаъолият менамоянд.
Дар соли гузашта дар донишгоҳ 481 нафар устоди асосӣ ва 131 нафар ҳамкор фаъолият намуд, ки аз онҳо 22 нафар доктори илм ва 151 нафар номзади илм аст.