Суғд: Бархурдории иштирокчиёни ҶБВ аз кумакпулӣ

Хуҷанд, 29.01.2015. (АМИТ “Ховар”,Абдуаҳад Шарифзода).-Дар шимоли кишвар мутобиқ ба қарори раиси вилояти Суғд Абдураҳмон Қодирӣ, иштирокчиён ва маъюбони Ҷанги Бузурги Ватанӣ аз кумакпулӣ бархурдор хоҳанд шуд. Тавре ки ба АМИТ “Ховар” аз Раёсати ҳифзи иҷтимоии вилоят иттилоъ доданд, тибқи қарори роҳбари вилоят, ба муносибати  70 — солагии Иди Ғалаба дар Ҷанги Бузурги Ватании солҳои 1941-1945  шурӯъ аз 1 январи соли ҷорӣ хамаи иштирокчиён ва маъюбони Ҷанги Бузурги Ватанӣ, маъюбони амалиёти ҷангӣ дар қаламрави давлатҳои дигар, маъюбони барқароркунии сохти конститутсионӣ дар Ҷумҳурии Тоҷикистон, инчунин аъзои оилаҳои ҷанговарони дар ин набардҳо ҳалокгардида вобаста ба карори ба табъ расида ҳар моҳ баҳри қадршиносиву дастгирии иҷтимоии онҳо ба андозаи 100 сомонӣ аз кумакпулӣ  бархурдор хоханд гашт. 
Бояд зикр намуд, ки дар айни хол  дар вилоят 265 нафар иштирокчӣ ва маъюби Ҷанги Бузурги Ватанӣ, 13 нафар ҳамсари бесаробонмонда, 862 нафар шахси дар давраи Ҷанги Бузурги Ватанӣ дар ақибгоҳ меҳнатнамудаи бо ордену медал сарфарозгардида, 298 нафар маъюби бартарафкунандаи садамаи Неругоҳи барқии атомии Чернобил, 100 нафар маъюби интернатсионалист, 104 нафар маъюби сохти конститутсионӣ, 293 нафар маъюби артиши Шўравӣ зиндагӣ дорад.