Таҳсили геологҳои тоҷик

Душанбе,  06.01.2015. (АМИТ «Ховар»,  Кристина  Эрлих).- Сарраёсати  геологияи  Тоҷикистон  ба  манзури   тарбияи  коршиносон  барои  таҳлили  минералҳо ва  арзёбии  иқтисодии  онҳо  дар  асоси  Ёддошт бо пажӯҳишгоҳи  федералии  улуми  геологӣ ва   захираҳои табиии  Олмон  курсҳои омӯзиши  арзёбии  иқтисодии  ашёи  хоми  минералиро   ташкил  намуд. Соли  2014  дар  ин   курсҳо  10  нафар  мутахассисони  Сарраёсати  геология  фаъолият  доштанд. 
Сардори Сарраёсати  геологияи   назди  Ҳукумати  ҶТ  Мурод  Хол Ҷумъазод  дар  ҷараёни  нишасти  матбуотӣ  аз  рӯи  натиҷаи  фаъолият тайи  соли  2014,  ки  имрӯз,  6  январ  баргузор гардид,  дар  ин  бора  хабар  дод. 
Дар  нишасти  матбуотӣ   зикр  шуд, ки  дар  асоси Ёддошти  байни  Сарраёсати геологияи  Тоҷикистон  ва Хадамоти геологии  Финляндия тибқи  лоиҳаи «Рушд ва омӯзиши  захираҳои табиӣ ба  манзури  беҳдошти некӯаҳволии Тоҷикистон» қитъаи  геологии Осиёи  Марказӣ  ва  равандҳои  геологии он таҳлилу таҳқиқ мешавад. Ғайр  аз  ин мутахассисони  ҷавони Сарраёсати  геология  дар  ҳошияи  лоиҳаи  мазкур  дар  Финляндия  таҳсил  намуданд.
Дар  давраи  ҳисоботӣ  дар  асоси Созишномаи байни хадамоти  геологии Вазорати захираҳои  маъдани  Ҷумҳурии  Мардумии  Чин  ва Сарраёсати  геологияи  Тоҷикистон  барои таҳқиқи  геологии  минтақаҳои сарҳадии Тоҷикистону  Чин  корҳои  судманд  анҷом дода шуданд, ки  дар  ҷараёни онҳо  геологҳои  Тоҷикистон  ширкат  доштанд.