Таъсиси маҷаллаи ҷадид барои донишҷӯён

Душанбе, 16.01.2015. (АМИТ «Ховар», Раъно Нусратуллозода).-«Раёсати донишгоҳ тасмим гирифта, ки маҷаллаеро таъсис диҳад, то дар он танҳо осори барҷаста ва гаронарзиши адибони хориҷӣ  интишор ёфта, асарҳои нигорандагон бояд аз ҷониби донишҷӯён тарҷума гарданд». Дар ин бора ректори Донишгоҳи давлатии омӯзгории Тоҷикистон ба номи Садриддин Айнӣ  Носирҷон Салимов дар нишасти матбуотӣ  иттилоъ дод. Дар такя бар қавли мавсуф, дар таълимгоҳ забонҳои олмонӣ, фаронсавӣ, кореягӣ, англисӣ  омӯзонида мешаванд ва муҳассилини ин риштаҳоро мебояд ба тарҷумаи осори мондагору пурҳикмати нависандагону шуарои бурунмарзӣ  машғул шаванд. Ҳадаф аз интишори маҷаллаи ҷадид ба кори тарҷумонӣ  ҷалб намудани толибилмон мебошад. Ректор изҳори итминон кард, ки бо ин васила ҳатман тарҷумонҳои хуберо метавонем тарбия намоем.  
Сарвари донишгоҳ дар посух ба суоли рӯзноманигорон доир ба фаъолият ва нақшаҳои минбаъдаи нашрияи «Омӯзгори ҷавон» зикр намуд, ки банду баст, фарогирии мазмуну муҳтаво ва баррасии мавзӯот дар ин ҷарида ба таври дилхоҳ ба роҳ монда шудааст. Алъон маъракаи обуна ба нашрия миёни муҳассилини шуъбаи ғоибона ҷараён дорад ва ҳайати эҷодиро зарур аст, ки дар 40 фоизи саҳифаҳои газета мақолотро барои ғоибхонон ба табъ расонад.  Раёсати донишгоҳ ба нақша гирифтааст, ки матбааи таълимгоҳро такмил бахшад. 
Дар қисмати дуюми нишасти матбуотӣ рӯзноманигорон бештар ба масоиле, чун ба ҷои кор ҳозир нашудани мутахассисони ҷавон, вазъи омоданамоии кадрҳои баландихтисос, раванди таҷрибаомӯзии донишҷӯён ва забондонии омӯзгорону толибилмон дахл карда, ба суолҳои хеш посухҳои қаноатбахш гирифтанд.