Тавсияи тухмиҳои навъҳои баланд

Душанбе, 17.01.2015. (АМИТ “Ховар”, Ситораи Боймурод).- Тибқи иттилои Вазорати кишоварзии Ҷумҳурии Тоҷикистон пешниҳоди Академия оид ба роҳҳои самарабахши истеҳсоли тухмии картошкаи навъи баланд дар минтақаҳои ҷумҳурӣ ба истеҳсолот тавсия дода шуд. Бо ин мақсад озмоишгоҳи биотехнология оид ба истеҳсоли минилӯндаҳои элитавӣ сохта шуд.
Барои васеъ ба роҳ мондани истеҳсоли тухмии навъи баланд технологияи парвариши микролӯндаҳои картошка аз буғумакҳои ниҳолҳои картошка дар шароити хоҷагӣ ба роҳ монда шуд. Ин имконият медиҳад, ки аз ниҳолҳои нодаркори картошка дар як гектар зиёда аз 1 млн дона микролӯндаҳои элитавӣ истеҳсол намоем. Самараи иқтисодии ин технология ба як сомонии сарфгардида 15 сомониро ташкил менамояд.