Теъдоди кортҳои пардохт 45,4 фоиз афзуд

Душанбе,  21.01.2015. (АМИТ «Ховар»,  Кристина  Эрлих).- Дар  соли  ҳисоботӣ  теъдоди  умумии   кортҳои  пардохти сохти  бонкҳои  кишвар 1  миллиону 107  ҳазору 100 ададро  ташкил  дод, ки  нисбат ба  соли 2013  баробари 45,4  фоиз  зиёд  аст.  Шумораи  соҳибони  кортҳои  пардохт  1  миллиону  70  ҳазору 700  нафарро   ташкил дода, баробари 43,6  фоиз  афзуд. 20  январ дар   нишасти  матбуотии Бонки  миллии  Тоҷикистон  рақамҳои  зикршуда  мисол  оварда шуданд. 
Раиси Бонки  миллии  Тоҷикистон  Абдуҷаббор  Ширинов  дар  нишасти  матбуотӣ   гуфт, ки  мувофиқи  маълумоти  фаврӣ,  дар  ҳамин  давра  фаъолияти  муттасили  низоми  пардохтии  «КОРТИ  МИЛЛӢ»  таъмин  гардида,  шумораи  умумии  иштирокдорони   низоми  мазкур ба 16  воҳид расид. Созмонҳои  қарздиҳандаи   иштирокдорони  низоми  пардохти  миллии «КОРТИ  МИЛЛӢ»  657  ҳазору  599 адад  корти  миллӣ  бароварданд, ки  нисбат ба соли  2013 барогбари  106  фоиз  зиёд  аст. 
Ҳамзамон,  мувофиқи  маълумоти  фаврӣ,  соли  2014  теъдоди  банкомату терминалҳои  электронӣ таносубан 704 ва 1  ҳазору 576 ададро  ташкил дода,  шумораи  банкоматҳо нисбат ба  соли  2013  баробари  156 ва терминалҳои  электронӣ  баробари  494  адад  афзуд.