Темурмалик-пешсафи даъвату гусел ба хизмати ҳарбӣ

Душанбе, 26.01.2015 (АМИТ «Ховар», Лайло Тоирӣ).-Ҳайати шахсии комиссариати ҳарбии ноҳияи Темурмалики вилояти Хатлон дар баробари даъвату гусели шаҳрвандон ба хизмати ҳарбӣ, инчунин дар ҳамкории наздик бо масъулини мақомоти вобастаи давлатии даъват ва дар доираи чорабиниҳо бо ҷавонон пайваста вохӯриҳои гуногун доир намуда, пирони рӯзгордидаро аёдат менамояд.
Комиссариати ҳарбии ноҳияи Темурмалики вилояти Хатлон на танҳо дар даъвати баҳориву тирамоҳии соли сипаригашта, балки солҳои пешин низ дар ҷодаи иҷрои уҳдадориҳои хизматӣ дар ин минтақа пешсаф буд.
Ин аст, ки масъулини мақомоти вобастаи давлатии даъват дар ин ноҳия, соли гузашта аллакай дар даҳрӯзаи оғози чорабиниҳои даъватии шаҳрвандон ба хизмати ҳарбӣ тавонистанд нақшаи ин маъракаи муҳими сиёсиро сари вақт ва бо сифати баланд иҷро намоянд. Омилҳои пеш аз муҳлат ба анҷом расонидани нақшаи даъват дар ноҳия- ин ҳамкории зич доштан бо аҳолӣ, бахусус ҷавонони ҷамоату деҳшӯроҳо ва шаҳрак мебошад.
Маҳз ташкили чунин вохӯриҳо бо ҷавонон, аёдати пирони рӯзгордида ва ба роҳ мондани дигар чорабиниҳои сиёсиву фарҳангӣ аст, ки комиссариати ҳарбии ноҳияи Темурмалик дар самти даъвату гусели ҷавонписарон ба хизмати ҳарбӣ тайи солҳои охир пешсаф мебошад.
Дар ин бора ба АМИТ «Ховар» аз хадамоти матбуоти Вазорати мудофиаи ҶТ хабар доданд.