Вазорати адлия: ваколатҳои судҳо афзудааст

 
Душанбе, 21.01.2015. (АМИТ «Ховар», Лайло Тоирӣ).-  «Истеҳсолоти иҷрочиёни суд сол то сол зиёд гардида истодааст. Агар дар соли 2008 ба истеҳсолоти иҷрочиёни суд дар сатҳи ҷумҳурӣ 23 177 ҳуҷҷати иҷро ворид гардида бошад, ин шумора дар соли 2014 ба 44661 ҳуҷҷати иҷро расидааст»,-гуфт вазири адлия Рустам Шоҳмурод имрӯз зимни нишасти матбуотӣ. 
Сабаби вақеияти мазкур ин татбиқи «Барномаи ислоҳоти судӣ-ҳуқуқӣ дар ЧТ», такмили соҳаи ҳуқуқи маъмурӣ ва оилавӣ, зиёд шудани теъдоди судяҳои судҳои ҷумҳурӣ ва бештар гардидани ваколатҳои судҳо мебошад. Аммо пас  аз ба тобеияти Вазорати адлия гузаронидани низоми истеҳсолоти иҷро шумораи иҷрочиёни суд 233 нафар боқӣ мондааст.
Вазорати адлия ва раёсатҳои он дар вилоятҳо дар давоми соли 2014-196 ташкилоти ҷамъиятӣ ва 10 798 шартномаи гаравро ба қайди давлатӣ гирифтанд.