Велосипед беҳтар аз мошин

Душанбе, 16.01.2015 (АМИТ «Ховар», Лайло Тоирӣ).- Дар мавриди  он, ки 80% ифлосшавии ҳавои ҷумҳурӣ ба  соҳаи нақлиёт рост меояд ва дар бештари мамлакатҳои пешрафтаи ҷаҳон  ба хотири бартараф намудани ин мушкилӣ  ба истифодаи  наклиёти барқӣ гузаштанд, раиси Кумитаи ҳифзи муҳити зисти мамлакат Хайрулло Ибодзода дар ҷараёни нишасти матбуотӣ иттилоъ дод, ки дар айни замон ба ҷумҳурӣ мошинҳои  гибрид ворид шудаанд.
«Мо ҳангоми бо  вазири тандурустӣ ва ҳифзи иҷтимоии аҳолӣ ба  Фаронса сафар намудан, ин масъаларо мавриди муҳокима қарор додем. Ба андешаи коршиносони хориҷӣ гузаштан ба велосипедронӣ  ҳалли ин мушкилӣ мебошад.  Дар айни замон онҳо  роҳҳои махсус барои велосипедронӣ ва қоидаҳои велосипедрониро коркард намуда истодаанд. Мо дар оянда дар ин самт кор ҳоҳем кард»,-гуфт Х.Ибодзода.
Дар ҷумҳурӣ дар айни замон бештари мошинҳо аз тариқи гази моеъ ҳаракат мекунанд ва он  ҳаворо ифлос намекунад. 
Раиси кумита ваъда дод, ки дар оянда дар ҳамкорӣ бо Вазорати нақлиёт  ба ҳадафҳои пешгирифтаашон дар самти тоза нигоҳ доштани ҳаво  мерасанд.