ВКД ҶТ: 5 амали террористӣ пешгирӣ шуд

Душанбе, 16.01.2015. (АМИТ «Ховар», Муқаддас Темурзода).-Имрӯз дар Душанбе бо иштироки вазири корҳои дохилӣ Раҳимзода Рамазон Ҳамро оид ба ҷамъбасти натиҷаҳои фаъолияти хизматии мақомоти корҳои дохилӣ дар давоми соли 2014 нишасти матбуотӣ баргузор гардид.
Вазири корҳои дохилӣ зикр кард, ки дар дувоздаҳ моҳи соли 2014 дар ҷумҳурӣ 19 ҳазору 352 ҷиноят ба қайд гирифта шудааст, ки аз он 17 ҳазору 498-тоаш ошкор гардид. Cатҳи кушодашавии ҷиноятҳо 87,7 фоизро ташкил медиҳад.
«Дар натиҷаи гузаронидани чорабиниҳои фаврӣ-ҷустуҷӯӣ ва амалиёти махсус дар ин давра 116 нафар аъзои ташкилоти террористиву экстремистӣ дастгир шуданд, ки аз тарафи онҳо 338 ҷиноят содир гардидааст»,- гуфт вазир ва илова намуд, ки дар соли сипаригардида ҳамчунин аз тарафи мақомоти корҳои дохилӣ 5 амали террористӣ пешгирӣ  шуда, як ҷинояти террористӣ ошкор гардид.