Вусъати ниҳолшинонӣ дар Кӯлоб

 Кӯлоб,  07.01.2015. (АМИТ «Ховар», Сулаймони Хол)- Бахшида ба 700- солагии олим ва мутафаккири  Машриқзамин Мир Саид Алии Ҳамадонӣ, 70- солагии Донишгоҳи давлатии Кӯлоб ба номи А Рӯдакӣ ва пойтахти фарҳангии давлатҳои Муштарак- ул манофеъ эълон гардидани шаҳри Кӯлоб дар соли 2015 дар шаҳр бунёди иншооти маданию маишӣ ва хизматрасонӣ аз ҷониби ҳокимияти давлатӣ ва соҳибкорони маҳаллӣ босуръат идома дорад. Дар маҳаллаи ба номи Ҷаббор Расулов бо дастгирии ҳокимияти давлатӣ дар рӯзҳои истироҳат аксари шаҳрвандон ва муҳассилини муассисаҳои давлатии шаҳри Кӯлоб ба ҳашар баромада, ба шинонидани ниҳолҳои мевадиҳанда машғул гардиданд. Дар ин рӯз сокинони маҳаллаи мазкур ва муҳассилини литсеи касбӣ- техникӣ беш аз 800 ниҳолро дар майдони 80 садяк шинониданд. Ба гуфти дастандаркорон чунин иқдом дар ҳамаи маҳаллаҳо ва кӯчаю хиёбонҳои шаҳри Кӯлоб то оғози фасли баҳор идома хоҳад ёфт.