Ҳалокати 600 нафар дар Ҳиндустон

Душанбе,18.02.2015. (АМИТ «Ховар», Иброҳими Ҳабибуллоҳ).-    Ҳукуматдорони Япония нақша доранд, ки 15 миллион доллари амрикоӣ маблағ барои мубориза бар зидди гурӯҳҳои ифротгаро ба неруҳои қудратии кишварҳои Шарқи Наздик кумак расонданд. Бояд гуфт, ки маблағи ҷудошуда аслан барои безараргардонии  ифротгароёни «Давлати исломӣ» мебошад, чунки  ду моҳ қабл дар Сурия ифротгароёни «Давлати исломӣ» ду шаҳрванди Японияро ба қатл расонданд.
     Душанбе,18.02.2015. (АМИТ «Ховар»).-Мувофиқи  итттилои Вазорати тандурустии Ҳиндустон аз аввали соли ҷорӣ то ҳол дар кишвар  аз вируси «Аш 1 Эн 1» қариб 600 нафар ба ҳалокат расидааст. Лозим ба ёдоварист, ки ин намуди зуком аз соли 2009-ум дар ин кишвар  хурӯҷ  намуда, то ҳол идома дорад. Аз ҳама ҳолати нигаронкунанда дар штатҳои қисми ғарби Раҷастан ва Гуҷарат ва штати Мадҳия-Пардеш, воқеъ дар қисми маркази Ҳиндустон ба назар мерасад. 
   Душанбе,18.02.2015. (АМИТ «Ховар»).-Дар як силсила штатҳои Иёлоти Муттаҳидаи Амрико муддати чанд рӯз аст, ки дар муҳосираи бориши барфи зиёд ва сардӣ қарор доранд. Сардии ҳаво ва яхбандӣ дар штатҳои Миссури, Арканзас, Огайо, Кентукки ва Индиана бештар ба назар мерасад. Бояд гуфт, ки дар шаҳри Вашингтони Амрико низ  вобаста ба сардии ҳаво ҳолати фавқулода эълон шудааст. Ҳукуматдорон фаъолияти муассисаҳои таълимиро то муҳайё гардидани шароити мусоид қатъ намуданд.
Душанбе,18.02.2015. (АМИТ «Ховар»).-Мувофиқи иттилои шабакаи интернетии Би-Би-Си дар Либерия пас аз шаш моҳи таваққуф фаъолияти таълимгоҳҳо боз  ба роҳ монда шуд. Ҳукуматдорони кишвар сабаби қатъ шудани фаъолияти таълимгоҳҳоро  дар робита ба хурӯҷи вируси Эбола меҳисобанд. Тибқи иттилои  Созмони байналмилалии тандурустӣ  дар Либерия бар асари табларзаи Эбола 3 ҳазору 800 кас ба ҳалокат расидааст.