Ҳодисаҳои қаллобӣ

Душанбе,  09.02.2015. (АМИТ «Ховар»).-  Чанде  пеш  Вазорати  корҳои дохилии  Тоҷикистон   нисбат ба чанде сокинони  ҷумҳурӣ  парвандаҳои  ҷиноӣ  кушод. Масалан, сокини  ноҳияи  Рӯдакӣ  Дилшод  Раҳимов  бо  гумонбари  қаллобӣ  дастгир  гардид. 
Назар  ба  иттилои ВКД  ҶТ, маълум  шуд, ки номбурда аз  сокини  ноҳияи  Файзобод  Саидаҳмад  Ғаниев  ба  маблағи  90  ҳазор  доллари  ИМА  қарз  гирифта, баъдан  59 ҳазор  доллари  ИМА — ро  ба  соҳибаш  баргардонида, ваъда додааст, ки  бақияи он —  31  ҳазор  доллари  ИМА — ро   баъди  6  моҳ  бармегардонад, вале  ин  маблағро  то  ҳол  ба  соҳибаш  надодааст. 
Дар  мавриди  дигар   маълум  гардид, ки  сокини  40 — солаи  шаҳри  Душанбе  Ҷ. Қурбонов  аз  сокини ноҳияи  Турсунзода  М. Солиев мошини тамғаи «Range Rover» — ро, ки  баробари  50  ҳазор  доллари  ИМА  арзиш  дорад,  иҷора гирифта, маблағи  зикршударо  то  ҳол  барнагардондааст.