Ҷамъомадҳои АНМН

Душанбе,  03.02.2015. (АМИТ «Ховар», Муқаддас  Темурзода).- Кормандони Агентии назорати  маводи  нашъаовари  назди  Президенти  ҶТ бо  иштироки намояндагони  Кумитаи ҷавонон,  варзиш  ва  сайёҳии   назди  Ҳукумати  ҶТ,  Корхонаи  воҳиди давлатии  «Маркази  иттилоот ва  тамоюлҳои  ҷавонон», «Маркази  миллии  имконоти  ҷавонони  шаҳри  Душанбе»  дар  маҳаллаи ба  номи Крупская  ва  коллеҷи  касбомӯзии  № 40  ноҳияи  Фирдавсии  пойтахт ҷамъомадҳо  ташкил  намуданд. 
Тавре  ки  Агентии назорати  маводи  нашъаовари   ҶТ  хабар  медиҳад,   дар  ҷамъомадҳо  масоили  ҷилавгирии   нашъамандӣ,  паҳншавии  бемориҳои  сирояткунанда,  тансиҳатии   насли  наврас  ва ҷилавгирии  хавфи  сӯиистеъмоли  маводи  нашъаовар  муҳокима  шуданд. 
Кормандони Агентӣ дар  бораи   оқибатҳои   ногувори   истифодаи   маводи  мухаддир, ки боиси  ҷинояткориҳои  наврасон  мегарданд,  суҳбат  намуданд.  Зикр  шуд, ки  волидайн   баробари   мактаб  барои  тарбияи  дуруст  ва инкишофи  мутаносиби  шахсияти наврасон масъулияти  бузург  доранд.