27 кг маводи нашъа дар халтаи биринҷ

Душанбе, 02.02.2015. (АМИТ «Ховар», Мавҷуда Анварӣ).-  Кормандони Агентии назорати маводи нашъаовар дар шаҳри Душанбе мошини “Opel-Veсtra” таҳти идораи сокини шаҳри Кӯлобро бо миқдори калони маводи нашъаовар боздошт намуданд.
Дар бордони мошин 2 халтаи биринҷ дарёфт гардид, ки дар дохили халтаҳо героин бо вазни 9 кг ва ҳашиш бо вазни 18 кг мавҷуд буд. Вазни умумии бор 27 килограммро ташкил менамояд.
Ҳангоми гузаронидани амалҳои тафтишотӣ муайян гардид, ки ронандаи мошин бо ҳаммаслаки худ — сокини ноҳияи Панҷ аз сокини вулусволии Имом-Соҳиби вилояти Қундузи Ҷумҳурии Исломии Афғонистон маводи нашъаоварро харид намуда, ният доштанд онро ба вилояти Суғд, баъдан ба қаламрави Федератсияи Русия интиқол диҳанд, аммо сари вақт аз тарафи кормандони агентӣ боздошт гардиданд.