Баррасии Конвенсияи СММ дар Парлумони Тоҷикистон

       Душанбе, 04.02.2015. (АМИТ «Ховар», Бекназари Абӯбакр). — Имрӯз вакилони Маҷлиси намояндагони Маҷлиси Олии Ҷумҳурии Тоҷикистон дар ҷаласаи навбатии иҷлосияи шашуми худ, ки таҳти раёсати раиси Маҷлиси намояндагон Шукурҷон Зуҳуров баргузор гардид,  Конвенсия оид ба имтиёз ва масуниятҳои муассисаҳои махсуси Созмони Милали Муттаҳидро тасдиқ карданд.
          Масъалаи мазкурро муовини вазири корҳои хориҷии Ҷумҳурии Тоҷикистон Давлатзода Парвиз ва раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба корҳои байналмилалӣ, иттиҳодияҳои ҷамъиятӣ ва иттилоот Салимзода Олим шарҳ дода, аз ҷумла изҳор доштанд, ки Конвенсия оид ба имтиёз ва масуниятҳои муассисаҳои махсуси Созмони Милали Муттаҳид  21 ноябри  соли 1947 дар шаҳри Ню-Йорк аз ҷониби Ассамблеяи генералии Созмони Милали Муттаҳид қабул шуда ва аз тарафи Президенти Ҷумҳурии Тоҷикистон ҷиҳати тасдиқ ва ҳамроҳшавӣ ба Маҷлиси намояндагони Маҷлиси Олии Ҷумҳурии Тоҷикистон пешниҳод гардидааст.
Конвенсияи  мазкур аз 11 модда, ки ба 49 фасл тақсим шудааст ва 18 замима иборат мебошад. Масуниятҳои Конвенсияи мазкур асосан оид ба дахлнопазирии амвол, фонд, даромадҳо, дахлнопазирии шахсии намояндагони муассисаҳои махсус, шахсони мансабдор ва аъзои оилаи онҳо марбут мебошанд. Конвенсия имтиёзҳои андозбандӣ, гумрукӣ ва дигар пардохтҳои ҳатмиро низ муқаррар менамояд.