Бунёди неругоҳҳои барқи обӣ дар Балҷувон

Балҷувон, 19.02.2015. (АМИТ «Ховар», Сулаймони Хол).- Солҳои охир соҳибкорони маҳалӣ ва аҳолӣ ба сохтмони неругоҳҳои хурд дар деҳоти дурдасти кишвар камар бастаанд. Дар ҳашт деҳаи ҷамоати деҳоти Сари Хосори ноҳияи Балҷувон дар айни замон 9 неругоҳҳои хурд ба истифода дода шуд, ки аҳолии ин деҳаҳо пурра бо неруи барқ таъминанд.  Сокинон бо истифода аз обу шароити мавҷуда кӯшиш бар он доранд, ки иқтидори неругоҳҳои хурдро бештар намоянд. Аз силсиланеругоҳҳои хурди барқи обӣ, ки иқтидорашон аз 5 то 25 киловат соат мебошад, дар ҷамоати мазкур беш 1200 нафар истифода мебарад. Дар ҳамаи хонаҳо фурӯзонакҳои каммасраф гузошта шуда, барои таъмиру нигоҳдории неругоҳҳо маблағи муайян пардохт мешавад.