Дастгирии буҷети давлатӣ дар ҳаҷми 100 млн. аз ҷониби БҶ

Душанбе, 04.02.2015. (АМИТ «Ховар», Мавҷуда Анварӣ).- Директори Бонки Ҷаҳонӣ оид ба Осиёи Марказӣ Сароҷ Кумар Ҷҳа натиҷаи мулоқоташ бо Президенти кишвар-Эмомалӣ Раҳмонро дар назди намояндагони васоити ахбори омма пурмуҳтаво, муфид ва судманд арзёбӣ намуд. 
Сароҷ Кумар Ҷҳа зикр кард, ки бо Роҳбари Давлати тоҷикон татбиқи амалии 12 лоиҳаи инвеститсионӣ бо маблағи умумии 185,1 миллион доллари амрикоиро, ки барои мусоидат ба рушди бемайлони иқтисоди  кишвар, таҳким ва тақвият бахшидан ба имконоти рушди минбаъдаи бахши хусусӣ, инчунин беҳтар гардонидани сифати хизматрасониҳои давлатӣ ва ҷамъиятӣ ба мардуми кишвар, ки дар ниҳоят ҳамаи он созгор ва ҳамқадам ба ҳадафҳои ҳукумати ҶТ, барои коҳиш додани сатҳи камбизоатӣ ва беҳтар гардонидани шароити рушди минбаъдаи иқтисоди Тоҷикистон равона гардидаанд, мавриди муҳокима қарор додем. 
«Мо инчунин имконоти мусоидат ва кумаки аз ҷониби Бонки ҷаҳонӣ ба Ҳукумати ҶТ ироа шударо дар самтҳои таҳким ва густариши минбаъдаи соҳаҳои кишоварзӣ, маориф ва илм, тандурустӣ мудирияти маблағҳо ва ё молиёти давлатӣ, нақлиёт, ҳамлу нақл ва инчунин эҳтимолияти дастгирии буҷети давлатӣ дар ҳаҷми 100 млн. доллари амрикоиро дар тӯли 6 моҳ ба нақша дорем»,-иброз намуд директори Бонки ҷаҳонӣ оид ба Осиёи Марказӣ.  
Бо мақсади коҳиш додани сатҳ ва ё фишори таъсири омилҳои беруна ин ниҳоди бонуфузи байналмилалӣ тасмим дорад, ки дар моҳҳои оянда иқтидору кумаки худро барои тақвият ва инчунин густариши имконоти таъсиси ҷойҳои нави корӣ дар маҳал ва деҳоти ҶТ мусоидати худро анҷом диҳад.