Иҷлосияи Кумитаи ҳуқуқҳои иқтисодӣ, иҷтимоӣ ва фарҳангии СММ

Душанбе, 26.02.2015 (АМИТ «Ховар»).-24-25 феврали соли 2015 дар ҷараёни иҷлосияи 54 Кумита оид ба ҳуқуқҳои иқтисодӣ, иҷтимоӣ ва фарҳангии Созмони Милали Муттаҳид дар Женева ҳайати Ҷумҳурии Тоҷикистон маърузаи миллии  даврии дуюм ва сеюми Ҷумҳурии Тоҷикистонро вобаста ба иҷрои муқаррароти Паймони байналмилалӣ дар бораи ҳуқуқҳои иқтисодӣ, иҷтимоӣ ва фарҳангӣ пешниҳод намуд.
Ҳайати кишварамонро, ки аз намояндагони вазоратҳои меҳнат, муҳоҷират ва шуғли аҳолӣ, маориф ва илм, тандурустӣ ва ҳифзи иҷтимоии аҳолӣ, Агентии омор иборат аст,  дар иҷлосияи мазкур вазири адлияи Ҷумҳурии Тоҷикистон Шоҳмурод Рустам роҳбарӣ мекунад.
Паймони мазкур дар асоси қатъномаи 2200А-и Маҷмаи умумӣ   аз 16 декабри соли 1966 қабул шуда ва тибқи моддаи 27-ум 3 январи соли 1976  эътибори қонунӣ пайдо кардааст.  Он фароҳам овардани шароитҳоеро, ки барои ҳар кас  имконияти истифода бурдани  ҳуқуқҳои  иқтисодӣ, иҷтимоӣ ва фарҳангии худро таъмин менамоянд,  пешбинӣ намудааст. Ҷумҳурии Тоҷикистон ба Паймони байналмилалӣ 4 январи соли 1999 ҳамроҳ шудааст.