Кӯлоб: омодагии ҷиддӣ ба интихобот

 Кӯлоб, 19.02.2015. (АМИТ «Ховар», Сулаймони Хол).- Ҳавзаҳои интихоботӣ оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон дар шаҳру ноҳияҳои кишвар ба интихобот омодагӣ мегиранд.  Дар комиссияи ҳавзаи якмандатии интихоботии  Кӯлоб №37 оид ба интихоботи вакили Маҷлиси намояндагони Маҷлиси Олии Ҷумҳурии Тоҷикистон корҳои омодагӣ ба анҷом расонида шуда, ҳамаи участкаҳои интихоботӣ бо дастурамал ва дигар ҳуҷҷатҳои лозимӣ таъминанд. Ба гуфти  Давлатшо Шарофиддинов, раиси ҳавзаи интихоботӣ дар участкаҳои интихоботӣ  рӯйхати интихобкунандагон тартиб дода шуда, шиору овеза ва дигар ҳуҷҷатҳои зарурӣ омодаанд. Дар участкаи интихоботии рақами 10 дар интихоботи дар пешистода 2069 нафар овоз хоҳад дод, ки 82 нафари он бори аввал дар интихобот иштирок менамояд. Дар маҷмӯъ, дар ҳавзаи интихоботии Кӯлоб №37 шумораи интихобкунандагон 97 ҳазору 536 нафарро ташкил медиҳад, ки 1565 нафараш имсол бори аввал овоз медиҳад.