Кӯшишҳо дар роҳи тарбияи ҷомеаи солим

Душанбе, 9.02.2015. (АМИТ «Ховар», Раъно Нусратуллозода). -Дар факултаи педагогии Донишгоҳи давлатии Хуҷанд ба номи академик Бобоҷон Ғафуров таҳти унвони «Дар роҳи тарбияи ҷомеаи солим» бахшида ба Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон ва «Дар бораи тарбияи худшиносии миллӣ, ифтихори ватандорӣ, шаъну шарафи шаҳрвандии хонандагону донишҷӯён, пешгирии зуҳуроти бегонашавӣ ва бегонапарастӣ, гаравиш ба ташкилоту созмонҳои ифротгаро ва тақлидкунандаи таассуби динӣ» бо иштироки устодон ва донишҷӯён чорабинии тарбиявӣ доир гардид. 
Дар чорабинӣ муовини сардори хадамоти пешгирии ҳуқуқвайронкунӣ байни ноболиғон ва ҷавонони раёсати ВКД дар вилояти Суғд подполковники милитсия Пӯлод Саидов оид ба мавзӯи «Сабаб ва оқибатҳои шомилшавии ҷавонон ба ҳизбу ҳаракатҳои ифротгаро» гуфт, ки дар самти пешгирии ҷавонон аз шомилшавӣ ба ҳизбу ҳаракатҳои мамнӯъ  нақши аҳли зиё, хусусан омӯзгорон назаррас аст, онҳо бояд пешсафи ҷомеа бошанд. 
Раиси Шӯрои уламои дини вилояти Суғд Ҳоҷӣ Ҳусайн Мӯсозода дар мавриди «Нигоҳи дини мубини ислом нисбат ба ҷавонони ифротгаро ва ҷудоихоҳ» зикр намуд, ки дар дини мубини ислом мақоми инсон баланд аст. Баъзан даъво мекунанд, ки ислом сабаби терроризм аст, вале дар асл экстремизму терроризм ба ислом ягон робита надоранд.