Кафили солимии хеш ва бунёдгари ҷомеаи солим гардед

Душанбе, 12.02.2015. (АМИТ «Ховар», Мавҷуда Анварӣ).-  Аз тарафи кормандони Агентии назорати маводи нашъаовар бо дастгирии ташкилоти байналмилалии “Фидокор” ва ташкилоти ҷамъиятии “Хуршед” дар мактаби таҳсилоти умумии №11 дар байни хонандагони синфҳои болоӣ ва падару модарони онҳо машварати омӯзишӣ баргузор шуд. Дар машварат намояндагони Кумитаи кор бо занон ва оилаи назди Ҳукумати Ҷумҳурии Тоҷикистон, рӯҳшиносон ва ҳуқуқшиносон иштирок намуданд.
Кормандони агентӣ оид ба бунёди оилаи солим, ки ин оила метавонад пойдевори ҷомеаи солим бошад, ҳарф зада, ҷавононро даъват намуданд, ки нагузоранд, то ашхоси дигар бо тақдири онҳо бозӣ намоянд. Ба суханони ҳар фарди ҷудоиандоз гӯш наандозанд, ба пешниҳоди истифода ва истеъмоли ҳар гуна маводи шубҳанок ё ҳабҳое, ки дар бораи он маълумот надоранд, қатъиян “не” гуфта тавонанд, кафили солимии хеш ва бунёдгари ҷомеаи солим гарданд.
Дар машварат филми мустанади  “Дидаи умед ”, ки ташкилоти ҷамъиятии “Хуршед” дар бораи ҳаёти кӯдакони душвортарбия ва онҳое, ки аз тарбияи падару модар дур мондаанд, омода кардааст, намоиш дода шуд.