Коллеҷи милиса довталабонро қабул мекунад
Душанбе, 10.02.2015. (АМИТ «Ховар», Муқаддас Темурзода).- Назар ба иттилои ВКД ҶТ, коллеҷи милисаи Вазорати корҳои дохилии Ҷумҳурии Тоҷикистон қабули довталабонро барои соли таҳсили 2015 — 2016 эълон мекунад.
Манбаъ ҳамчунин хабар медиҳад, ки ба коллеҷ довталабон аз ҷумлаи ятимон, фарзандони кормандони мақомоти ҳифзи ҳуқуқ, ки ҳангоми иҷрои вазифаи хидматиашон ҳалок шудаанд, ҳамчунин шаҳрвандони дигари Тоҷикистон қабул карда мешаванд.
Коллеҷи милиса барои ниҳодҳои махсуси мақомоти ҳифзи ҳуқуқи кишвар мутахассис тайёр мекунад. Таълимот дар коллеҷ бо истифода аз маблағҳои буҷа, сарфи назар аз мансубияти нажодӣ, ҷинс, забон ва вазъияти иҷтимоӣ сурат мегирад.
Барои таҳсил шахсони синнашон аз 15 то 20 — и дорои маълумоти миёнаи нопурра барои таҳсили чорсола, ҳамчунин синнашон аз 17 то 27 — и дорои таҳсилоти миёнаи умумӣ барои таҳсили сесола қабул карда мешаванд.
Ҳангоми интихоби номзадҳо ба сифатҳои психологӣ, шахсию касбӣ, вазъи саломатӣ ва тайёрии ҷисмонии онҳо таваҷҷуҳи хоса зоҳир мегардад.
Синни номзадҳо барои дохилшавӣ ба коллеҷ то вазъи 1 сентябри соли дохилшавӣ ба назари эътибор гирифта мешавад.